X
Menu
X

OSTANA

OSTANA

Es la comuna pus pichòta d’la valada, e un exemple de requalificacion arquitectònica entelligenta que lhi a ganhat lo titol d’un di Borg pus bèls d’Italia.
Lo nom Ostana venaria da Augustana, en referiment al mes d’avost en la forma romansa oust, benlèu perquè un bòt d’istaa lhi passaven lhi tropèls en pastura. Autres penson que lo nom arsòne la fondacion al temp de l’Emperator August: la comuna de fach a coma simbol lo “glaudium”, arma d’August.
Esparpanteats entre las ruaas se tròbon chapèlas e pilons; la pus importanta es aquela de Sant Nicolau, en posicion panoramica sus un bauç a l’ombra d’un grand faul. Es un de lhi edificis religiós pus antics de la valada; documents d’arquivi asseguren que aquì lhi seria istaa la premiera parròquia d’Ostana, devengua lazeret al temp de la pest del 1489. Chal navisar decò la gleisèta de Sant Bernard, ente de recents restaurs an trobat de frescs enteressants.
Al Musèu civic Etnografic, dedins l’antic Palais Comunal, son presentaas scenas de la vita passaa d’Ostana.

L’AUTA VALADA: LO CAS D’OSTANA
Las ruaas de Criçòl, Onçin e Ostana rapresenton un patrimòni de granda valor istòrica, culturala e materiala. De fach quarqu’una pòl èsser catalogaa entre lhi pi bèls exemples d’arquitectura alpina istòrica.
Darrierament Ostana es deventaa un important referiment per lo recuper e la valorizacion de l’arquitectura alpina: despuei lo 1985, la comunitat locala a embraçat la politica de re-empleg des anticas construccions montanas en una vision de qualitat.
Lhi entervents an enteressat sie lo patrimòni public qu’aquel privat, sie la part construïa que lhi espacis dubèrts.
Lo re-empleg e la qualificacion del patrimòni arquitectònic an creat una nòva identitat e an rendut reconoissibla aquesta pichòta comuna de montanha, e l’an portaa a renaisser decò sot lo plan econòmic e social.
Qualitat arquitectònica, identitat e nòva abitabilitat, sostenibilitat ambientala, oferta d’un torisme respectuós di pòsts, son lhi ponchs de fòrça d’Ostana per lo futur. Una filosofia que darrierament l’a facha intrar ental grop di “Borgs pi bèls d’Italia”.

Informacions Utilas

Autessa: 1282 m slm
Distança da Coni: 79 Km
Ruaas e fraccions: La Villa, Lhi Marquèt, Lo Conh, Lhi Bas, Lhi Loìs, Sant Bernard, Lhi Martin, Meiras di Berard, la Ruaa, Miriquiri, Champanha, Guilhèlm, Lombard, Ras, Lhi Bòdo, Lhi Lorenç, Lhi Champets, Aquò d’Barra, Aquò dal Mèr, Aquò di Riu, L’Uelme, Lo Bric, Aquò di Fresia, Aquò dal Lòng, Aquò de Minic Chard
Patron: sant Glaude
Espòrts estius: promenadas, trekking, rampinhada sus ròcha, rampiquin
Espòrts envernals: esquì alpinisme, chastras, cascadas sus glaç
Comuna: 0175.94915