X
Menu
X

BARGE

BARGE

La comuna de Barge a una istòria ben antica, precedenta lhi premièrs documents escrichs: lo testimònion las incisions antropomòrfas sus ròcha retrobaas sal Mont Brac.
Lo pagus, pichòt vilatge en epoca romana, a un fòrt esvilup urbanistic vers lo Mila. Aprés passa sot lhi Conts de Turin (XI-XII secle), di Marqués de Saluces, de lhi Acaia e puèi di Savòia. Mas mec entre lo secle XV e XVI lo paìs a un esvilup comercial, artisanal e urbanistic, liat sustot a la lavoracion del ferre e del grassart.
Despuei aqueste moment l’alma d’Barge deven la peira. Detzenas de laboratòris artisanals grands o pichòts començon a trabalhar aqueste òr gris, esportant-lo ental mond entier.
L’estructura urbanistica del paìs es articulaa en tres borgs principals: sobeiran, sotan e vielh. Aqueste garda enca’ una part des anticas formas medievalas embè maisons autas e quintanas, traversaas da la via maestra. Lo Borg Sotan e la vielha vila, la part popolaa jà ental Medioevo fòra da las muras, ven eslarjat ental Sieis-Set Cents embè maisons a la mòda rurala, realizaas a l’entorn de grandas corts, e enca’ en l’Uech Cents embè quarque vilin e palais borgués. Lo Borg Sobeiran, bela si a origina antica, es menc enteressant perquè modificat da l’arquitectura moderna.
Barge conta nombrós monuments e gleisas de granda valor istòrica e artistica, coma la gleisa parroquiala del Set Cents dediaa a Sant Joan Baptista, creaa sus dessenh de l’arquitect Francesco Gallo, naissua al pòst de l’antica gleisa romanica, de la quala a mantengut lo cloquier del XI secle, biforas e arquets. La parroquiala encuei es en estil baròc piemontés, embè cupola elliptica de grandas dimensions e una façada caracterizaa mec da dui elements decoratius, lo portal e l’estatua de Sant Joan.
Dins un encharmant canton del borg aut se tròbon lhi rests del primitiu Chastèl dich Sotan, destrujut dai Savòia ental 1363 e transformat en convent francescan. Lhi prencis d’Acaja, senhors de Barge, potencion la fortificacion jonhent lo chastèl a un second (una ròca), tot sarrat da una dobla cinta de muralhons, destrujua dai francés ental 1557.

Informacions Utilas

Autessa: 372 m slm
Distança da Coni: 51 Km
Ruaas e fraccions: Beltramon, Carutti, Caissina Altacima, Caissina Goretas, Colombera, Combas, Crotziera de Barge, Gabiòla, Galleanas, Jala, Goretas, Mondarel, Montescòt, Ripaoira, Ruaa Comba, Ruaa Paulida, Ruaa Genovés, Sant Chafred, Sant Jacom, Sant Martin, En l’Issart, Sant’Antòni, Torriana, Votter
Patron: Sant Joan Baptista
Centres esportius: pallavòl, pallaman, fotbòl a cinq, basket, tennis, ping pòng
Servicis: farmacia, pòsta, banca, bancomat, biblioteca, cine, area atreçaa de Pont Grana
Espòrts estius: promenadas, trekking, rampiquin, bici, equitacion
Merchat setmanal: jòus
Comuna: 0175.347601